حال الغُنا العربي

شعر بالعامية المصرية: جيهان بركات
حب إيه

يا قلبي يرحم زمن سِت الغُنا العربي
أيام مَا كان فيه طرب بنقول عليه شعبي
قنديل وكارم ورشدي ومحمد العِزَبي
"سماح" يا قنديل و"تلات سلامات" لمواويلك
وانت يا "ليل طَوِّل" عشان كارم يغنيلك
"عـَ الرملة" يا رشدي إكتب كلمة لأبنودي
حلف بليغ لازم ألحَّنها على عودي
عِزَبي يا عذب الصوت غنِّي لـ "بهية" وعيونها
وقول يرحم زمان الغنوة الحلوة وأوانها
عارفة يا ست الكُلّ ان "اللمبى" غنَّالِك؟
وقف على المسرح بيترنّح
في ليل إسود غطيس حالك
غَنَّى كطير صدَّاح "حُب إيه" ورَدّوا عليه
وآآآه يا بليغ لو شفت اللى بيجرَى لألحانك
"السعد وعد يا عين" زى مَا قُلتي يا ثومة
لا هيئة ولا صوت لكن أهي أرزاق ومقسومة
مكتوبله ياكل عيش فـِ زمن أذواقه معدومة
زمن تاهت مَعَالمُه واشمعنى الغُنا يعني؟
أهي فُقاعات فـِ الهوا واهو كله بيغنّي