مش لاقيكي

كلمات الشاعر: أحمد فضل شبلول

مش لاقيكي بين سطوري
حرف ضايع من ضميري
لحن تايه في الأغاني
حلم هارب م الأماني
مش لاقيكي ..
***
مش لاقيكي في الزحام
طيف يعدِّي .. والسلام
والقى عمري في رُباكي
ورد دابل بين إيديكي
مش لاقيكي ..
***
والشوارع في عيوني
سوِّدِتْ لونها الزتوني
كحلتْ خطوة سكاتي
مهدتْ لحظة مماتي
مش لاقيكي ..
***
مش لاقيكي يا حبيبتي
فين أنا .. وفينك انتي
اتقابلنا زمان وياما
الوطن أصبح علامة
وافترقنا زي موجة
فوق شواطئ ريح وهوجة
قلبي صفَّى كل نبضه
نبضك انتي جاني بعضه
قلت احاول من جديد
أكتبك فوق الجليد
لجل يدفا الكون بإسمك
يتنقش في الدنيا رسمك
وابدأ الأحلام معاكي
واعلا واعلا في سماكي
بس قلبي مش لاقيكي
حلم تايه في عينيكي
مش لاقيكي ..
مش لاقيكي .. أحمد فضل شبلول
الإسكندرية 25/4/2002